... hanap higayon matud pa – Tomas

Napanglantawan ni Mayor Tomas Osmeña nga hanap ang kahigayunan ni Srp Manager ug Cebu City Planning Officer Nigel Paul Villarete pagka general manager sa Mactan Cebu International Airport Authority (MCIAA).

Kini human nakita sa mayor ang halapad nga impluwensiya sa magpapatigayong Lucio Tan nga maoy nanag-iya sa Philippine Airlines (PAL) nga interesado usab sa maong posisyon.

Nasayran nga mipakanaog na og desisyon ang Civil Service Commission (CSC) nga nagsalikway alang sa renewal sa appointment ni MCIAA general manager Adelberto Yap gumikan kay wala kini makapasar sa civil service eligibility.

Sila si Villarete ug Ahmed Cuizon sa MCIAA's Public Affairs Division maoy gihugon hugonan karun nga mga kwalipikado nga nominado alang sa maong posisyon.

Apan alang kang Osmeña bisan asa nila ni Villarete ug Cuizon pabor siya niini gumikan kay pulos Sugboanon ang maong mga opisyal nga nasuhito sa pamaagi sa pagpadagan sa operasyon sa maong airport dinhi sa Sugbo.

Gipasalig ni Osmeña nga dili siya magduhaduha pagbuhi kang Villarete sa pagka SRP manager ug pagka planning officer kun matudlo gyud kini sa nahisgutang posisyon gumikan kay alang niya dili siya mobabag sa mga itanyag nga oportunidad sa iyang mga sakop.

Nasayran nga si Osmeña usa kini sa mi-endosar kaniadto kang Villarete ngadto ni Presidente Gloria Arroyo aron matudlo sa nahisgutang posisyon.

Pagkakaron gipasalig sa mayor nga andam gihapon siyang moduso og rekomendasyon kun mangayo ug magkinahanglan niini si Villarete.

Hinuon bisan og dili kwalipikado si Yap sa maong posisyon apan gihangop gihapon sa mayor ang iyang performance nga matud niya mas arang-arang nalang kun itandi sa mga nangagi nga general manager sa maong airport.

Usa sa gitumbok sa mayor mao si kanhi MCIAA general manager Angelo Verdan nga gihulagway sa mayor nga bias ngadto sa Philippine Airlines (PAL).