Interesado's Villarete pagka-GM sa MCIAA

Interesado si SRP manager ug Cebu City Planning Officer Nigel Paul Villarete pagdawat sa posisyon isip general manager sa Mactan Cebu International Airport Authority (MCIAA) kun ugaling itudlo sa maong katungdanan.

Matud ni Villarete wala niya kinahanglana nga mangayo og endorsement ngadto ni bisan kinsa nga opisyal dinhi sa Sugbo aron maangkon ang maong posisyon gumikan kay hangtud karun pabiling aktibo ang iyang application.

Gibutyag ni Villarete pagkakaron ang iyang application pending pa sa mga sakop sa board sa MCIAA ug gani nakaabot na ang kopya sa maong application ngadto sa Department of Transportation and Communication (DOTC).

Giawhag usab ni Villarete ang mga sakop sa board sa pag-resolbar sa isyu aron ipaklaro nga ang mga sakop sa board lang ang makapili ug itudlong mohulip sa pagka general manager sa MCIAA nga dili na magkinahanglan og endorsement pa sa mga impluwensyadong indibidwal ug ni Arroyo mismo.

Ang posisyon sa pagka general manager sa MCIaa nagkinahanglan kini og 3rd level eligibility gikan sa Civil Service Commission.

Matud ni Villarete nga duna pay daghang mga 3rd level eligible sa CSC dinhi sa Sugbo gawas nilang duha ni Ahmed Cuizon.

Wala hinuoy pagsupak si Villarete kun mo-endosar ang presidente og opisyal alang sa pagka general manager sa MCIAA bisan og ang mga sakop sa board maoy makabuot niini basta kwalipikado ug makamao ang itudlong hulip niini.