Higpit nga seguridad atol sa Mantawi fiesta

Hugtanong bantayan sa kapolisan sa dakbayan sa Mandaue ang mga dagkong kalihukan sa tinuig nga pangilin ni Sr. San Jose, patron sa dakbayan sa Mandaue.

Kini ang naglakip sa final screening sa Miss Mandaue 2006 nga himuon sa Mandaue City Sports and Cultural Complex sa Sabado sa gabii, Mantawi Festival sa tibuok adlaw sa Domingo ug ang kapistahan karong Lunes sa Mayo 8.

Sa nasayran nga 20 ka batan-ong babaye ang mag-inidigay atol sa final screening nga pagahimoon ug koronahan usab gilayon ang mapili niini kanila.

Si Sr. Supt. Eduardo Catabas nga maoy direktor sa kapolisan ang mipahimutang og mga sakop sa kapolisan sa palibot sulod sa compound sa Mandaue City Sports and Cultural Complex alang sa paghatag og kasiguroan sa manan-aw niini.

Sumala pa ni Catabas nga atol usab sa pagpahigayon sa Mantawi Festival nga magsugod pinaagi sa pagparada sa kadalanan sa mga contingent higpit usab nga pagabantayan pinaagi sa ibutang nga kapolisan.

Himuon ang higpit nga pagbantay hangtod na sa ilang katapusang pagsayaw sa reclamation area nga gipaabot nga magtapok ang daghang mga tawo nga manan-aw.

Dugang pa ni Catabas nga ang mga sakop sa Mobile Patrol Unit (MPU) higpit usab nga magbantay sa kadalanan hangtod na sa kapistahan aron sa paghatag og kasiguroan sa mga bisita ug dumoduong batok sa pundok sa dautang elemento nga mopahimulos sa kahigayonan.