BHW sa nasud ok sa Chacha

Lakip karon sa nanawagan alang sa pagsagop sa Parliamentary System sa panggobyerno ang kahugpungan sa mga Barangay Health Workers sa nasud.

Gipadayag ni Ermelinda Abadiano, BHW sa dakbayan sa Sugbo ug nasudnong pangulo sa National Confederation of Barangay Health Workers of the Philippines nga ang pag-usab sa sistema sa panggobyerno maoy sulbad sa sigeng away sa Senado ug sa Ubos-Bay Balauranan.

Giangkon ni Abadiano nga minus ra ang iyang nahibaw-an mahitungod sa maayo ug dili maayo sa parliamentary system apan nanawagan silang mga BHW sa pagwagtang sa Senado ug Ubos-Bay Balauranan.

"The disunity between the Senate and Congress has affected the progress of our state of economy because instead of legislating laws, politicking becomes the main highlight," nagkanayun si Abadiano.

Nanawagan usab si Abadiano sa mga lider sa nasud nga dili lang pamolitika ang tan-awon kon dili ang paghiusa nga masulbad ang nag-unang problema sa katawhan nga mao ang kakabus.

Samtang gihimakak ni Abadiano ang taho nga dunay mga BHW ilabi na sa Luzon nga gibayran og tag P200 aron pagsuporta sa people's initiative alang sa Charter Change ug paggamit kanila sa pagpanguha og pirma sa katawhan sa kabarangayan.

Gipadayag ni Abadiano nga ang mga BHW ang kanunay lang mapagan sa pamolitika sanglit kadaghanan kanila dali ra nga tangtangon ilabi na kon masayran nga dili tawo sa usa ka barangay kapitan.

Gipahinumduman usab ni Abadiano ang mga politiko nga ang mga BHW wala magdawatan og sweldo gawas sa gamay kaayong honoraria.

"Leaders must remember that BHWs do not receive salaries but just honoraria and that BHWs continue to work because volunteerism is already inculcated in their hearts," dugang pa ni Abadiano.