Mass wedding sa Mantawi

Hingpit na gayod nga gihiusa isip bana ug asawa ang 65 ka parisan sa mass wedding nga gipasiugdahan sa kagamhanan sa dakbayan sa Mandaue kagahapon sa buntag.

Ang seremonyas sa kasal sa maong gidaghanon sa mga bag-ong magtiayon nga gihimo sa sulod sa National Shrine sa Saint Joseph sa Centro sa maong dakbayan ang gihimo human usab sa misa nga gipahigayon.

Ang mass wedding nga gipasiugdaghan kabahin sa kalihokan sa Mantawi Festival nga gikatakdang pagahimoon karong Sabado sa Mayo 7 niining tuiga.

Ang buhatan sa Barangay Affairs and Coordinating Office (BACO) nga gipangulohan ni Jovito "Jonkie" Ouano maoy nagdapit sa bag-ong magtiayon nga nagtipon pag puyo nga wala makasal ug nakabaton na og mga anak.

Si Ouano ug ang asawa niining si Melanie mao usab ang principal sponsor ug gisaksihan usab sa uban pang opisyal ug mga higala ug kabanay niini.

Si Monsenyor Adelito Abella nga maoy kura paruko sa Saint Joseph Parish Church maoy nangulo sa gihimong seremonyas sa kasal ug giabagan kini sa laing upat ka mga pari.

Ang traysikad nga napuno sa dayan-dayan maoy giluwanan sa mga nagpakasal nga magtiayon gikan sa Heritage Plaza sa Centro, paingon ngadto sa Mandaue City Sports and Cultural Complex sa Sitio Tribunal diin usab himoa ang bangkete.