Army gidudahang gitumba sa mga NPA

Patay ang usa ka Army corporal human kini gipusil sa wala pa mailhing mga suspek samtang ang biktima ug tulo ka mga kaubanan namista diha sa Sitio Mang-alho,Ipil lungsod sa Carmen kagahapon sa kaadlawon.

Si Corporal Eric Lucero,32, sakop sa Special Operations Command sa Philippine Army nga nagbase sa Ilo-ilo City ug nagpuyo sa Corte, Carmen wala na kaabot nga buhi sa Danao District Hospital gumikan sa igo sa walang bahin sa iyang ulo nga milapos sa pikas.

Gikan pa nakig-inom ang biktima uban sa iyang mga kabanay sa balay ni Konsehal Flaviano Batiquel ug mibiya sila aron unta manan-aw og disko dihang nahitabo ang pagpamanhig.

Ang armas sa biktima nga kalibre 45 pistola nga may sulod nga upat ka buhing bala, cellphone ug pitaka sa biktima narekober ra sa kapolisan. Gisusi na karon kun ang mga rebeldeng New Peoples Army ang mitipi sa biktima gumikan kay naila na ang biktima nga sakop sa militar diha sa maong lugar.

Si Central Command Spokesman Lt. Col. Jefferson Omandam sa pakighinabi mibutyag nga wala nila isalikway nga may kalambigitan ang NPA sa hitabo sanglit nasakop sa mga apektadong lugar sa insurhensiya ang maong lungsod.

Dugang pa ni Omandam nga duna gyuy intensyon nga patyon ang biktima gumikan kay gihimo kini nga gabii ug planado kaayo.