Jojo's Tower may desinyo na

Nahuman na ang desinyo alang sa planong pagatukoron sa kagamhanan sa siyudad sa Sugbo nga usa ka unom ka andana nga parola nga pagatawgon unya kini og Jojo's Tower.

Kining maong parola gipahinungod kini sa mga maayong binuhatan ug kaisog sa kampanya batuk sa mga ilegal nga panagat sa gipatay nga project director sa Bantay Dagat Commission Elpidio "Jojo" dela Victoria Jr.

Kagahapon sa udto pormal nga gipresentar ni Mayor Tomas Osmeña ngadto sa mga sakop sa media ang nindot kaayong desinyo sa maong tukoron nga Jojo's Tower nga mahimutang unya diha sa Kawit sa South Reclamation Project (SRP).

Matud sa mayor himuon unya niya kini nga susama sa detachment sa Philippine Air Force gumikan kay pagatawgon man unya kini nga communication center sa Sugbo.

Gipaabot nga mahimutang unya diha sa maong parola ang usa ka radar, detector ug uban pang klase sa kahimanan nga magamit alang sa komunikasyon nga gitumong aron maprotektahan ang coastal areas kun daplin sa dagat ug kabaybayonan sa SRP batok sa mga kadaot.

Matud sa mayor gawas sa katukoran unya sa maong Jojo's Tower ihinayon sab sa siyudad ang pagtukod sa uban pang mga edipisyo alang sa senior citizens ug DOT.

Kagahapong adlawa nakigtigum usab si Osmeña ngadto sa hepe sa Cebu City Police Office (CCPO) Supt. Melvin Gayutin ug CIIB chief Paul Labra ingon man ngadto kang Konsehal Augustus Pe Jr. alang sa planong pagbutang og security camera sa SRP ug uban pang mga pamaagi pagpalig-on og pagmentinar sa kahusay ug kalinaw sa maong multi billion peso project sa siyudad.