Construction worker napiit sa elevator

Patay ang usa ka construction worker human kini mahagbong ug mapiit sa elevator sa ilang gitrabahoang building sa Osmeña Tower diha sa Osmeña boulevard ning dakbayan sa milabay'ng gabii.

Ang biktima giilang si David Lucay-lucay , 26, lumad nga taga Dinagat Island, Surigao Norte ug kasamtangang nagpuyo sa Sambag Uno ug nagtrabaho sa J-King Construction nga nagtrabaho sa maong edipisyo.

Samtang ang gitumbok nga operator sa elevator giilang si Maximo Gemao, 42, stay-in sa maong site.

Sumala pa sa imbestigasyon ni SPO3 Zenaido Pastorfide sa Homicide Section ang suspek ug duha ka mga construction workers nga sila si Toni Alcosero, 18, ug Lucio Watin padulong sa ika -pito nga andana luwan sa elevator.

Apan pag-abot palang diha sa ikaupat nga andana kalit nga may nadungog nga lagubo ang tulo ug ilang nakita diha sa screen nga bungbong ang biktima nga napiit sa elevator ug sa kongkretong bungbong sa edipisyo.

Diha-diha gihunong ni Gemao ang elevator ug gipaninguhang makuha si Lucay-lucay apan pakyas kini gumikan kay patay na ang biktima.

Sa pagsusi sa mga imbestigador dunay dakong samad sa ulo ug walang bukton ang biktima.

Samtang human sa insidente mitahan sa iyang kaugalingon ang operator sa elevator.