BOC-Mactan may bag-ong deputy collector for administration

Bag-o na ang milingkod isip deputy collector for administration sa Bureau of Customs Subport of Mactan.

Kini ang nasayran gikan ni Atty. Ernesto Urbano, ang Collector sa Mactan nga nahinabi sa Banat News.

Matud pa ni Urbano nga pormal na nga milingkod isip iyang deputy collector for administration si Fe Toring sugod niadtong milabay'ng Biyernes, Abril 28.

Ang pagkadestino ni Toring sa BOC-Mactan base kini sa Customs Personnel Order nga giisyu ni BOC Commissioner Napoleon Morales.

Si Toring kanhi nadestino sa Cebu Customs District Office isip hepe sa Post-Entry Audit Division. Tungod sa maayo niyang performance na-promote kini sa iyang katungdanan.

Matud ni Toring nga iyang paninguhaon nga iyang mahatagan og katagbawan ang mga opisyal nga naglantaw sa kaayuhan sa buhatan sa Customs pinaagi sa iyang pagserbisyo ug ang relasyon sa mga empleyado ubos sa iyang pagdumala isip deputy collector for administration sa Custom-Mactan.

Ang presensiya ni Toring sa BOC-Mactan gikalipay og dako ni Urbano gumikan kay nadugangan na usab ang iyang mga sakop ug dako ang pagsalig niini kang Toring gumikan sa iyang mga kasinatian sa BOC.