Lahugay gipatuman

Mga opisyal sa Cebu City Police Office nga girelibuhan sa ilang mga puwesto gumikan sa pagkuyanap sa ilegal nga sugal sa ilang hurisdiksyon gibalik na sa pwesto apan sa laing police station na sila gibutang.

Si Cebu City Police Director, Supt. Melvin Gayotin sa pakighinabi sa Banat News mitug-an nga tungod sa kakulang sa mga opisyal sa Sugbo gipatuman ang maong lahugay ug gibalik ang maong mga hepe.

Sila si Supt. Marciano Batiancela ug Chief Inspector Doroteo Mantos nga maoy mga hepe sa Waterfront Police Station ug Carbon Police Station kahinumduman girelibuhan niadtong milabay'ng buwan gumikan sa giingong pagkatap sa mga ilegal nga sugalan ug video karera sa ilang mga hurisdiksyon.

Apan ning pagpatuman sa lahugay sila si Batiancela ug Mantos nga naa sa Service Security Group gibalik sa pwesto isip mga hepe diin si Batiancela ibutang sa San Nicolas Police Station samtang si Mantos ibutang sa Punta Prinsesa Police Station.

Ang hepe usab sa Guadalupe Police Station nga si Supt. Pedrillo Villamor maoy ibutang sa Waterfront Police Station samtang ang hepe sa Punta Prinsesa maoy ibutang sa Carbon Police Station.

Ang luyo-luyong hepe sa Guadalupe police nga si Sr. Insp. Catalino Nacario maoy mamahimong acting police station chief sa maong buhatan.

Matud pa ni Gayotin nga mahimo untang ipabalik sa ilang karaang mga pwesto sila si Mantos ug Batiancela apan gumikan sa kakulangon gyud og opisyal ug paglikay sa mga kontrobersya wala na kini buhata ni Gayotin.

Alang sa direktor sa kapolisan sa dakbayan nga paigo nang napamatud-an diha sa Police Regional Office 7 nga wala magmika sila si Mantos ug Batiancela sa ilang mga puwesto tungod kay duna may mapakitang operasyon batok sa iligal nga sugal nga gilusad ang duha samtang sila pay nabutang sa maong mga police station.

Sa bag-ong kamanduan nga "three strike policy" ni PNP director Arturo Lomibao bisan kinsang mga hepe sa kapolisan sa matag dapit mamahimong relibuhan kun dunay madakpang mga iligal nga pasugalan ang unit nga gipadala sa Crame diha sa ilang mga hurisdiksyon.