Boundary gihatag sa Busay gihangop

Gihangop dayon ug gikalipay sa mga opisyal sa bukirang barangay sa Busay sa siyudad sa Sugbo ang bag-ong desisyon ni Mayor Tomas Osmeña nga nagtugyan ngadto sa ilang barangay sa boundary nga maoy giawayan tali nila ni Lahug Barangay Captain Mary-Ann delos Santos ug Apas Barangay Captain Clemente Rosales.

Gibutyag ni Busay barangay captain Eleodoro Sanchez nga nalipay sila nga nakit-an sa mayor ang ilang katakus sa pagserbisyo sa mga molupyo ug sa Marco Polo Plaza Hotel nga nahimutang sa maong kontrobersyal nga utlanan.

Gihulagway ni Sanchez nga dako og matabang aron molambo ug madugangan ang kita unya sa koleksiyon sa buhis sa ilang barangay kun matuman ug ka-aprobahan sa konseho sa siyudad ang maong laraw.

Nasayran nga nahimutang sa gilalisan nga boundary sa Apas ug Lahug mao ang bag-o lang gibuksan nga establisamento nga kanhi Cebu Plaza Hotel nga gipaabot unya nga magbayad og dakung buhis sa Barangay Busay.

Hinuon gipasabot ni Sanchez nga niadtong wala pa kabuksi og balik ang maong hotel sila maoy moatiman og hipos sa mga mabiyaan nga basura sa mga molupyo nga naglibot sa maong hotel.

Giangkon ni Sanchez nga mas duol ug sayon alang nila ang pagserbisyo ingon man ang pagtubag sa bisan unsang alarma sa maong establisamento ug sa mga molupyo sa palibot niini.