DOLE di motugot sa usbaw kun...

Ang Department of Labor and Employment (DOLE) dili motugot sa dili makataronganon nga usbaw sa suholan kun makaapekto na sa mga magpapatigayon ug makaingon hinuon nga manaktak og kawani o ba kaha makapasira na hinuon sa kompaniya.

Si DOLE undersecretary Manuel Imson nagkanayon nga paboran lang nila ang usbaw sa suholan kun dili kini makaapekto sa mga magpapatigayon ug makadugang pa og trabaho.

Atol sa Advertising Congress adunay mga sugyot kabahin sa across the board wage increase apan giangkon ni Imson nga kutob lang sa pagpasiugda og public hearing ang DOLE kabahin niini.

Diha na mosunod ang DOLE kun duna nay nauyunan sa Regional Tripartite Wages Productivity Board kabahin sa bag-ong suhulan nga gilangkuban sa sektor sa mga kapitalista, mamumuo ug representante sa ahensya sa gobiyerno .

Si Imson nagkanayon nga dako ang impact ngadto sa mga magpapatigayon ang bisan unsang pag-usbaw sa suholan ug benipisyo sa mamumuo tungod kay ubos sa nagkalain-laing industriya ug gidak-on sa patigayon ang mga nalambigit nga sektor.

Ang dagkong kompaniya malagmit nga gamay lang para kanila ang i-implementar nga usbaw sa suholan apan sa mga gagmay'ng kompaniya maglisod niini.