Nadugta nga babaye nailhan

Nailhan na sa kapolisan ang nadugtang babaye nga mihuot sa lungag nga nadiskubrehan niadtong Domingo sa hapon sa Sitio Banatayan Basdiot, Moalboal, dili diay kini Italyana.

Giila sa kapolisan sa Moalboal ang biktima mao si Jovelyn Maamo, 17 anyos, dalaga nga lumad nga taga Bohol ug kasamtangan nanimuyo sa Barangay Basdiot, samtang ang nakakita sa patay'ng lawas mao si Alexander Fableo, 31, minyo nga taga Barangay Tubli ning lungsod.

Nasayran sa Banat News sa gihimong pakisusi ngadto sa kapolisan nga matud pa nga si Jovelyn Maamo mogamitay og ginadiling drugas ug usahay maoy suguon sa pagpalit og shabu.

Si PO2 Edgar Mantalaba sa Moalboal Police Station nga nahinabi usab sa Banat News niingon nga gilubong na kagahapong adlawa human ang mga ginikanan ni Maamo gikan sa Bohol maoy niila sa patay'ng lawas niini.

Gibutyag ni Mantalaba nga wala pa sila masayod sa tinud-anay nga motibo, kon si kinsa ang responsable sa kamatayon ni Maamo.

Hinuon si Mantalaba niingon nga nagpadayon pa ang ilang gihimo nga imbestigasyon sa kamatayon sa pamasin nga adunay motunga nga saksi ug kinsay katapusan nga gikuyogan sa biktima.