Panag-ilog sa gripo misangko's tinigbasay

Gumikan sa inilogay sa linya sa pagsag-ob og tubig usa ka tawo gitigbas sa Panas I, Consolacion sa milabay'ng gabii.

Ang biktima mao si Cristopher Atoil, 30, nga nagpuyo sa maong dapit, samtang gitumbok nga nagtigbas mao sila si Ruben Oporto, lumad nga taga Panuypoy, Consolacion ug Thadeo Capangpangan, taga San Vicente, Liloan.

Base sa imbestigasyon ni SPO3 Joseph Yongco sa kapolisan sa Consolacion samtang naglakaw si Atoil kuyog ang mga higala niini kalit lamang kining giduol ni Capangpangan ug gibunalan og botelya sa ulo.

Atol sa panaglalis ni Capangpangan ug Atoil mitunga usab si Oporto dayong tigbas kang Atoil gamit ang usa ka pinote.

Si Atoil nakaangkon og samad tinigbasan sa iyang ulo, tuhod, nawong ug bitiis hinungdan sa pagdala niini ngadto sa Vicente Sotto Memorial Medical Center ug anaa sa lisod nga kahimtang sa paghimo ning balita.

Matud pa ni SPO3 Yongco nga base sa pamahayag sa mga nakasaksi sa maong hitabo nga sayo pa sa buntag sa milabay'ng adlaw nagkalalis si Capangpangan ug Atoil atol sa ilang pagsag-ob og tubig sa maong dapit nag-ilogay sila kun kinsa ang unang nakaduol sa gripo.

Ang maong panghitabo misantop sa pagdumot ni Capangpangan ngadto kang Atoil hinungdan nga ila kining giatngan sa usa ka hilit nga dapit sa milabay'ng gabii.

Si Capangpangan ug Oporto dali kaayong misibat sa maong dapit ug padayon pang gipangita sa mga awtoridad.