Napatay sa vigilantes nadungagan og usa

Talaan sa mga gipamatay sa gidudahang mga sakop sa vigilante nadugangan na usab human itumba ang usa ka gidudahang badlungon diha sa eskina sa Panganiban ug Colon, Pahina Central ning dakbayan kagahapon sa kaadlawon.

Ang biktima giilang si Francis Arcenal alyas Michael, 23, molupyo sa nahisgutang barangay bisan naigo na sa ulo giingong giduol ug giusban pa og pusil sa daw naniguro nga suspek.

Sa imbestigasyon nila ni SPO3 Zenaido Pastorfide sa Homicide Section kasamtangang nakigtabi ang biktima sa iyang mga higala diha daplin sa dalan dihang niabot ang duha ka motorsiklong pulos dunay tag duha ka mga tawong sakay.

Ang upat nagsuot og itom nga panapton nga gisapawan og crash helmet ug armado og kalibre 45. Ang sakay sa kolor blue nga motor maoy giingong mikanaog ug mipunting sa ulo ni Arcenal.

Dihang nabalit-ad ang biktima giduol kini sa suspek ug giusban pagpusil sa nagkadaiyang parte sa lawas una pa yanong mibalik sa nagpaabot nga mga kauban ug nangikyas.

Gidala sa mga silingan ang biktima sakay sa traysikad diha sa Cebu City Medical Center dili layo sa gikahitaboan apan gumikan sa grabeng samad nga naangkon niini patay na kining midangat sa maong tambalanan.

Si Arcenal maoy nadugang sa kapin 140 na ka mga biktimang gipamatay sa mga gidudahang sakop sa vigilante sukad niadtong Disyembre 22 sa tuig 2004 diin sagad sa mga gipamatay dunay mga criminal records ug nalambigit sa mga pagpangawat, panulis ug drugas.

Si JO1 Catherine Cintos sa Bagong Buhay Rehabilitation Center mitug-an sa Banat News nga unang nasulod sa BBRC si Arcenal niadtong Oktobre 24, 2001 tungod sa kaso sa drugas ug nakagawas niadtong Nobiyembre 22, 2001.

Sa edad nga 16 anyos nabalik siya og sulod Abril 29,2002 tungod gihapon sa drugas ug paghupot og mahait nga hinagiban apan gipabalhin siya sa Operation Second Chance sa Kalunasan ug nakagawas Agosto10, 2002 apan niadtong Oktobre 6,2005 napaslak siya og balik sa BBRC gumikan sa kasong attempted theft ug ning milabay'ng Enero 23, 2006 na siya nakagawas.