Motor misampak sa pipeline, 1 patay

Patay ang usa ka backrider sa motor human misampak sa usa ka main pipeline nga tubo sa Metro Cebu Water District diha sa Inayawan, dakbayan sa Sugbu niadtong Domingo sa kaadlawon.

Gideklarar nga dead on arrival diha sa Cebu City Medical Center ang biktimang si Junrey Rusel, 22, residente sa Lower Torre sa nahisgutang barangay samtang gitanggong sa kapolisan ang silingang drayber nga si Sherwin Ybiernes, 22.

Base sa imbestigasyon ni SPO3 Julio Requina,Jr. sakay sa usa ka Aura Kawasaki nga kolor blue ang duha subay diha sa dalan Greenfield sa maong barangay dihang nasampak ang motor diha sa tubo sa MCWD.

Gumikan sa kakusog sa pagsampak maayong pagkabunal sa namatay diha sa sementadong dalan nga nakaingon sa grabeng kadaut sa kalawasan ug ulo niini.

Human sa insidente gidakop ang drayber ug gikatakdang pasakaan og kasong reckless imprudence resulting to homicide ug damage of property gumikan sa kadaut sa pipeline sa MCWD.