Mipusil sa asawa nagpusil sa ulo

Gipusil sa nangabubhong bana ang iyang asawa hinungdan sa pagkaigo niini sa liog ug tuo nga kilay ug sa pagtuong patay na kini nag-unay kini sa pagpusil sa iyang kaugalingon ug mao na hinuon ang namatay.

Nahitabo kini alas 5 pasado ang takna sa hapon niadtong miaging Domingo sa Zone Ubi, Paknaan, Mandaue.

Ang namatay mao si Lemuel Coyoca Arabes, 27, ug ang naangol niyang asawa mao si Josephine, 30, nga mga lumad nga taga barangay Pajo, lungsod sa Daanbantayan ug temporaryo nagpuyo sa nahisgotang dapit.

Sa imbestigasyon ni PO1 Melvin Pelayo sa Presinto 3 sa Basak sa maong dakbayan maoy mitumaw nga ang bana nga namatay sayo pa sa buntag niadtong Domingo nga nag-inom uban sa mga higala.

Matud pa ni PO1 Pelayo nga hubog na kining mipauli sa ilang panimalay nianang hapon ug nangabubho kini sa asawa nga maoy hinungdan sa panag-away sa magtiayon.

Dugang pa ni PO1 Pelayo nga milungtad og pipila ka oras ang panaglalis niini hangtod nga ang bana mikuha sa gitagoan niining armas nga kalibre 38 ug unang gipusil niini ang asawa.

Sumala pa ni Pelayo nga ang mga silingan human makabati sa nagsunodsunod nga pagbuto sa armas maoy nagtaho niini ngadto kanila.

Dali nilang gidala ang magtiayon sa tambalanan nga pulos nagkadugo ang kalawasan apan namatay gayod ang bana nga nakabaton og pinusilan sa tuong tampihak sanglit naigo man ang utok niini.

Samtang ang asawa nga natapsingan sa liog ug kilay nagpabilin sa Mandaue City Hospital ug padayong giatiman sa mga doktor.

Napalgan usab sa kapolisan ang armas nga kalibre 38 nga maoy gigamit sa maong pagpamusil sa sulod sa panimalay sa magtiayon nga may tulo ka mga kabhang.