Crips namusil; 4 nangaangol

Sakop sa Crips Gang namusil sulod sa diskohan ug upat ang naangol didto sa Calderohan, Casuntingan, Mandaue kagahapon sa kaadlawon.

Ang mga biktima mao sila si Jose Perales, 16, usa ka sakop sa Bloods, Chadrick Blanco, 16 mga lumolupyo sa maong dapit, Ernesto Espilita, 39, minyo taga Maguikay ug Lilia Simeon, 49, lumolupyo sa Floremer Subdivision, Banilad, Mandaue.

Samtang ang gitumbok nga maoy namusil mao si Marlo Lonescan alyas Arm, hingkod ang panuigon ug usa ka sakop sa Crips, Raymond Paquibot, 18, ulitawo ug Jason (apelyido gipugngan), 16, mga residente sa Tabuk, Mandaue.

Base sa imbestigasyon ni PO2 Rey Manatad ug PO1 Sandre Torres nga samtang adunay disko sa maong dapit nakita ni Marlo nga sakop sa Crips si Jose sakop sa Bloods nga misaway sa diskohan ug kalit kining namusil.

Atol sa maong insidente naigo si Perales ug samaran sa iyang tuong kamot, samtang ang naangol mao si Blanco dunay samad sa walang bukton, si Espilita naigo sa iyang pulso ug si Simeon sa iyang walang tuhod hinungdan nga gidala kini sa Mandaue District Hospital ug hinuon luwas na sa makuyaw nga kahimtang.

Human sa maong insedente misibat si Lonescan luwan sa usa ka motorsiklo nga gimaneho ni Paquibot samtang si Jason ang nag-angkas isip back-up.

Sa dihang nakita ni PO2 Manatad ug PO1 Torres ang tulo ka suspetsado ila kining gigukod ug sa dihang miabot kini sa Tabok si PO1 Torres nagpasalba hinungdan ang mga suspetsado miambak sa ilang gisakyang motor diin gibiyaan nga nag-andar.

Sa dihang nakorner si Paquibot ug si Jason nasikop kini sa kapolisan sa Station 4 samtang si Lonescan nakasibat kini sa maong dapit.

Atol sa imbestigasyon miangkon si Raymond ug Jason nga mga sakop sila sa Crips (usa ka fraternity) apan mipanghimakak nga sila ang namusil sa diskohan ug mitumbok ngadto kang Lonescan nga maoy naghupot sa usa ka armas.

Ang duha ka suspetsado gitanggong karon sa kapolisan sa station 4 sa MCPO ug andam na ang kasong ipasaka batok kanila ug lakip sa pasakaan og kaso mao si o Lonescan bisan pa kini nga gawasnon.