Plebisito sa chacha karon nang Hunyo

Posible nga mahinayon ang plebisito karong Hunyo alang sa kausaban sa sistema sa gobiyerno gikan sa presidential ngadto sa parliamentary system, matud pa ni Bishop Nilo Tayag sa Iglesia Katolika Filipina Independiente.

Si Tayag nga nahinabi sa tulomanon Lanog sa Kalungsoran sa DYMR mibutyag nga natino na sa Sigaw ng Bayan Movement (SBM) diin usa siya sa mga lider niini nga nasabtan na pag-ayo sa mayoridad sa katawhang Pilipino nganong gikinahanglang usbon ang sistema sa panggobiyerno sa nasud.

Iyang gipasabot nga nia karon sa Sugbo ang mga nagkalainlaing lider sa SBM aron tukoron ang nagkalainlaing organisasyon ug kahugpongan sa tanang sektor sa katawhan aron ipasabot ang bahin sa charter change.

Matud pa ni Tayag nga iyang gihagit ang mayoridad sa katawhan sa dili lang pagpamati sa sangyaw sa mga oposisyon batok sa chacha.

Ang mahinungdanon nga masabtan nila nga dinhi sa Asya, Pilipinas nalay nagtikawtikaw nga nasud nga nagsagop ning karaang presidential system.

Maoy hinungdan nga miungot ang kahimtang sa nasud ug naglisod pag-aginod ngadto sa iyang kalamboan gumikan sa pagkapolitiko sa mga tawong mamunoan niini.

Nalakbitan niya paghisot nga niadtong panahon ni kanhi Presidente Ferdinand Marcos, gipatuman na unta ang sistemang parliamentarya sa kagamhanan.

Ugaling ang gisagop ni Marcos mao ang "French Style" nga parliamentary system, diin presidente lang gihapoy labing gamhanan sa nasud.