Habalhabal vs bus; 1 patay

Namatay ang habalhabal driver ug grabe usab nga naangol ang pasahero niining backrider dihang kalit lamang nga gikasungag ang Ceres Bus Liner.

Nahitabo ang aksidente sa national highway sa Poblacion, Minglanilla alas 5 pasado ang takna sa hapon niadtong miaging adlaw.

Ang biktima mao si Zaldy Jonsay, 31 anyos, minyo nga taga Lower Tunghaan, Minglanilla ug ang grabeng naangol mao si Audie Savillon, hingkod ang panuigon ug nagpuyo usab sa maong dapit.

Ang gikasungag sa habal-habal nga gimaneho sa namatay mao ang Ceres Bus Liner nga nagdala sa plate number nga PVS 137 nga gimaneho ni Sergio Dumagan, hingkod ang panuigon nga taga dalan Natalio Bacalso Avenue dakbayan sa Sugbo.

Si SPO1 Ricky Larobes sa kapolisan sa maong lungsod nga gikahinabi sa Banat News miingon nga ang bus gikan sa dakbayan sa Sugbo ug mi-overtake sa nag-unang sakyanan.

Matud pa niya nga kusog kining nagdagan subay sa national highway ug gikasugat ang motorsiklo nga giluwanan sa mga biktima ug nadagit niini dihang migawas na sa lane sa dalan.

Dugang pa ni SPO1 Larobes nga dali nga gidala ang mga biktima sa tambalanan apan namatay gayod ang habal-habal driver nga si Jonsay ug ang kauban niining si Savillon anaa sa kakuyaw nga kahimtang.

Ang drayber sa Ceres nga nakadasmag sa mga biktima mitahan sa iyang kaugalingon sa kapolisan sa maong lungsod.