Labor day rally andam na - Igot

Andam na ang lapad nga lihok protesta nga pasiugdahan sa mga mamumuo ug mga kaalyado niining militanteng pundok karun adlaw'ng Lunes sunod semana atol gyud sa Labor Day sa Mayo 1 dinhi sa dakbayan sa Sugbo.

Ang maong protesta pasiugdahan sa AMA Sugbo KMU ug mga kaalyado niining grupo nga moduso sa ilang demanda alang sa P125 across-the-board increase ug ang pagsupak sa planong pag-amendar sa Konstitusyon pinaagi sa gipasiugdahan karon nga people's initiative.

Gibutyag ni Nicasio Igot, tigpamaba sa AMA Sugbo KMU sugdan nila ang maong protesta sa alas 10 sa udto diha sa Fuente Osmeña ug mag-martsa paingon sa Colon area.

Nanawagan ang AMA Sugbo KMU ngadto sa lainlaing sektor nga mosalmot sa lapad nga protesta nilang himoon atol sa Labor Day.

Ang maong grupo mibasol sa kasamtangang administrasyon ni Presidente Gloria Arroyo nga gihulagway nila nga nagmika ug walay pagpakabana sa panginahanglan sa mga kabus ug yanong lungsoranon.

I-apil sab nila sa maong rally ang pagpadayag og pagsupak sa people's initiative nga gipasangil nila nga gimaniobra sa gobyerno ginamit ang DILG aron makakuha sa 12 porsiyento nga pirma gikan sa kinatibuk-ang mga rehistradong botante dinhi sa nasud aron maoy basihan unya sa Comelec pagpatawag og plebisito.

I-presentar sa maong grupo ang pipila ka mga nakapirma sa signature form nga gi-verify karun sa Comelec nga mi-withdraw sa ilang pagpirma niini gumikan sa rason nga wala sila pasabta og maayo sa mga opisyal sa barangay nga maoy nangusog sa pagpanghipos sa maong mga pirma.