Puya nga giputos og papel kit-an

Usa ka puya nga giputos og papel ug gituohang gilabay sa wala mailhing inahan napalgan sa tulo ka mga bata nga nagdula alas 4 pasado ang takna niadtong miaging hapon sulod sa compound sa Radja Homes sa Mahayahay, Bankal, Lapu-Lapu.

Ang maong puya gibanabanang upat ngadto sa lima ka bulan.

Si PO2 William Humoc sa Homicide Section sa kapolisan sa maong dakbayan maoy mitubag sa maong alarma didto sa maong dapit.

Dugang pa niya nga ang nakakaplag sa maong puya mao sila si Jesson Igot, 13, Dona Labrador, 10, ug Marcelo Pino, 15 nga pulos nagpuyo sa maong dapit.

Ang maong mga bata maoy nagtaho niini ngadto sa mga lumolupyo sa maong dapit kinsa mipahibalo usab niini ngadto kanila.