Rodman nangindiyan

Gipakitaan sa National Basketball Association rebounding legend ang mga sakop sa media kung nganong nabansagan siyang "bad boy of NBA" kini human wala niya tungaha ang press conference kagahapon sa buntag diha sa Mandaue City Hall ug lain pang press conference nga gitakdang iyang tambungan.

Ang mga sakop sa media nga nagpaabot kaniya diha sa buhatan ni Mayor Thadeo Ouano nadismaya dihang makatulo ka higayon nagpabalhin-balhin og dapit nga ilang tiguman apan sa katapusan mi-walk out ra si Rodman sa conference hall.

Si Rodman ug pipila ka mga legend sa NBA nakigsangka kagabii sa mga sakop usab sa Philippine Basketball Association All Star San Miguel Selection diha sa Mandaue City Sports Complex diin higpit kaayo ang seguridad nga gipatuman.

Gikatahong atol sa pag-abot sa grupo ni Rodman gidalitan sila og budbod ug uban pang pagkaong ginama sa dakbayan diin giingong kalit nga gilamoy ni Rodman ang budbod apil na ang panit niini.

"Tinuod lagi, way binuang, gidiretso raman niya og lamoy, he doesn't know how to eat budbod, amo ganing gibuyag 'tong iyang bodyguard. Ang iyang mga kauban ako pang gitudloan kung unsaon pagkaon siya nikaon naman," asoy pang Ouano kinsa maoy Mandaue City Sports Commissioner sa pakighinabi sa Banat News sa telepono kagahapon.

Dunay pagduda nga maong wala mahinayon ang press conference gumikan sa pagkakaon ni Rodman sa panit sa budbod, samtang duna say mipasabot gikan sa grupo ni Rodman nga hapo ang lawas niini gikan sa biyahe maong wala kini makatambong.

Human unta sa presscon sa Mandaue mobalhin sila sa Yo Latino dinhi sa dakbayan sa Sugbu apan wala mouban si Rodman sa iyang grupo.