Mangulingay gipusil-patay

Usa ka lalaki nga mangulingay gipusil patay sa wala pa mailhing tawo kagahapon sa buntag alas 11 ang takna sa Gapo, Matun-og usa ka bukirang barangay sa Balamban, 17 ka kilometros gikan sa Poblacion.

Si Genevieve Sukib, 36, asawa sa biktima mitaho sa kapolisan alas 2:45 pagkahapon sa gidangatan sa iyang bana nga si Marcelo Bugto, 40, nga nagpuyo sa maong dapit.

Si Sukib niingon nga namutol og kahoy iyang bana aron himuon og uling sayo sa buntag. Pagkahuman naghakot na kini labang sa sapa, apan aduna siyay nadungog nga sunod-sunod nga buto sa armas, hinungdan nga iya kining gisusi apan maoy iyang nakita nga nagkulob na si Bugto daplin sa sapa nga naglunang sa daghang dugo.

Gumikan sa mga samad pinusilan sa iyang buko-buko, namatay kini dihadiha.

Matud pa ni PO1 Arman Enriquez sa pakighinabi sa Banat News ila pang susihon ang maong dapit nga nahitaboan kun aduna bay kontra o atraso ang biktima sa ilang dapit.

Gibutyag ni Enriquez nga maglisod sila sa pagresponde sa maong dapit gumikan kay layo na ug dili usab maagian og sakyanan.