'Killer' sa Akrho nadakpan sa Liloan

Nakapatay og sakop sa Akrho nasikop human sa upat ka bulan nga pagtago-tago sa Tabay, Tayud lungsod sa Liloan kagahapon sa hapon.

Ang nasikop mao si Rafael (apelyedo gipugngan) 17, ulitawo, nga lumad sa Sitio Landing Brgy. Catarman lungsod sa Liloan usa ka sakop sa Beta Gamma Rho fraternity.

Matud pa ni SPO2 Rofino Grancho sa Intelligence Section sa Liloan Police station nga sud sa upat ka bulan nilang gipangita si Rafael.

Hangtud ila kining nakit-an sa maong dapit hinungdan nga nadakpan kini gamit ang warrant of arrest gikan kang RTC Judge Ulrich Cañete.

Sa pakighinabi sa Banat News, si Rafael mihimakak sa kalambiggitan pagpusil patay kang Dennis Areglo Sollano, 23, ulitawo, nga taga Kalubihan, Yati, Liloan kinsa sakop sa Akrho.

Matud pa ni Raffy nga igo lang siyang nikuyog sa iyang mga kauban sa fraternity ug dili siya ang mipusil ni Dennis kundili ang iyang kauban, apan wa kini mihingan .

Kahinumduman nga si Dennis gipusil niadtong Disyembre 24 sa gabii didto sa simbahan katoliko sa lungsod sa Liloan human sa katapusang Misa de Gallo.

Si Dennis nagbarog sa gawas sa simbahan diin kalit lang kini nga gipusil sa grupo sa mga batan-ong sakop sa BRP diin usa sa giila mao si Raffy.