Si Mayor Ronald Allan Sesante sa Dalaguete mibutyag kagahapon sa mga tigbalita nga nakaapekto sa panginabuhian sa lumolupyo sa lugar ang pagkahunong sa operasyon sa Ibalong Mining Development Corporation.
Matud ni Sesante nga ang maong kompaniya sa mina usa sa nakahatag og panginabuhian sa mga residente sa lungsod.
Gibutyag ni Sesante nga adunay 130 ka mga trabahante sa mina dihang nag-operate pa kini apan karon adunay 30 na lang ka nagtrabaho nga mga maintenance.
Kagahapon gibutyag usab ni Sesante nga niadtong Lunes adunay gipahigayong meeting uban ni Yang Tong Yang general manager sa mining company tali sa mga opisyal sa lungsod ug ang meeting nagtuki sa maong problema.
Ang Department of Energy (DOE) maoy grupo nga gisangonan sa pag-imbestigar sa pagkahagsa sa minahan.
Si DOE Regional Director Eduardo Amante mibutyag nga si Yang Tong Yang mipadala og suwat ni Energy Secretary Raphael Lotilla para ipadali ang resolusyon sa kaso.
Niadtong Disyembre 10, 2005 ang minahan nahagsa ug mikalas kini og walo ka kinabuhi sa mga minero.