Wala imbitaha ang shipping industry vs. terrorist

Mga nanag-iyag mga barko mireklamong wala imbitaha sa gipahigayong counter-terror conference nga sa ila pang pangangkon direkta silang naapektahan sa terorismo.

Matud pa sa usa ka dakong opisyal sa usa ka dakong shipping company dinhi nga mitawag sa The Freeman/Banat News nga wala silay nadawat nga imbitasyon kabahin sa maong kalihukan.

"Shipping companies are supposed to be directly concerned with this but we have been left out," sumala pa sa maong opisyal.

Dunay mitambong nga dili momenus 500 ka mga delegado gikan sa 60 ka mga nasud atol sa gihimong Counter-Terrorism Experts Conference sa miaging semana.

Apan ang mga opisyal nga sila si Sr. Supt. Ronald Roderos sa Police Regional Office 7 mibasol hinuon sa mga shipping companies sa wala nila pagkaapil sa nakatambong.

Matud pa nga angayang sila na mismo ang nangunay og adto sa maong kalihukan gumikan kay duna may online registration, gani si Sr. Supt. Lani O Nerez nagpaabot ra og 200 ka mga delegado gikan sa 40 ka nasud apan ang nanambong miabot og 500.

Hinuon ang maong kalihukan wala mopokus sa seguridad sa transportasyon, apan si Roderos ug Nerez parehong misaway sa kalugak sa seguridad diha sa pantalan.

Matud pa nga walay klarong pagsiksik sa mga container vans nga manulod ug mogawas dinhi sa pantalan sa Sugbu nga posibleng kabutangan og mga bomba.

Samtang ang mga pasaherong manakay ra maoy siksikon ug dili ang mangabot.

Kahinumduman nga duna nay mga insidente sa pagpamomba sa barko nga gidudahang binuhatan sa mga terorista, sama sa nahitabo sa Superferry 14 ug MV Doña Ramona.