Ocampo 'hadlok' ma-death'

Ang suspetsado pagpatay ni Bantay Dagat project director Elpidio dela Victoria nga si SPO1 Marcial Ocampo nahadlok nga masilotan siya og kamatayon kon si RTC judge Ireneo Lee Gako maoy mohupot sa iyang kaso.

Kini maoy rason nga ang mga abogado ni Ocampo miduso og Motion for Inhibition sa hukmanan nga nag-awhag ni Judge Gako nga dili na mopadayon sa paghusay sa maong kaso.

Sila si Atty. Vicente Fernandez ug Hector Fernandez nga maoy mga abogado ni Ocampo miingon nga ang ilang kliyente wala'y maayong kinatulgan tungod kay nabalaka kini nga tinud-on ang bahad sa huwes.

Sa nahibaw-an nga si Judge Gako mao usab ang miisyu og search warrant aron ang panimalay nga gipuy-an ni Ocampo diha sa dalan Tres de Abril maronda ug masiksik sa mga polis.

Atol sa pagronda sa gipuy-an ni Ocampo kaniadtong gabii sa Abril 17, nakuha nila ang usa ka kawo ug sapatos nga giila sa mga saksi nga maoy gisul-ob ni Ocampo dihang gipatay niya si Dela Victoria.

Matud ni Ocampo nga dunay polis nga apil sa mga mi-search sa iyang panimalay nga mitug-an kaniya nga si Judge Gako nanganti g'yod nga kon ang kaso anha mapunta kaniya, iyang konbiktohon og kamatayon ang polis.

Dihang gi-raffle ang kaso, wala tuyoa nga ang kasong murder nga gipasaka batok ni Ocampo didto mahipunta sa RTC branch 5 nga gidumala ni Gako.

Si Ocampo miingon nga nasayod siya nga si Judge Gako nakapuyo sa Tabunok, Talisay ug nabalaka siya nga basin madala siya sa "pressure" sa taga Talisay nga ipakonbikto g'yod siya tungod sa pasangil nga siya ang mipatay ni Dela Victoria nga lumulopyo usab sa maong dakbayan.

Tungod sa maong awhag ni Ocampo, si Judge Gako miawhag dayon ni Talisay City prosecutor Marshall Rubia nga mohatag sa iyang komentaryo kon pabor ba siya o kaha supak sa awhag nga laing huwes ang mohupot sa kaso.

Si judge Gako wala pa usab makaresolbar sa awhag ni Ocampo nga hatagan siya og higayon nga mapamatud-an ang iyang pagka-inosente sa kaso atol sa usa ka preliminary investigation.

Nagpasabot kini nga ibaliwala ang "information" sa kaso nga gipasaka sa hukmanan ug ibalik kini sa fiskaliya. - Uban sa taho ni Brenda D. Batuto