Kawsa ni Jojo daghang mopadayon

Gihulagway sa bugtong anak ni Elpidio "Jojo" dela Victoria nga si Vincent nga usa ka buotan ug ligdong nga amahan si Jojo ug matinud-anon sa iyang serbisyo para sa kaayohan sa katawhan.

Matud ni Vincent nga adunay mga limitasyon apan ang iyang amahan nakaluwas sa maong limitasyon ug gibuhis niini ang kaugalingong kinabuhi para sa kaayohan sa tanan.

Si Jojo usa ka mapinanggaong amahan kaniya ug bana ngadto sa iyang inahan nga si Evelyn.

Tungod sa dakong gugma niini sa makagagahom hinungdan nga miserbisyo kini sa simbahan ug gipakita usab niini ang iyang pagkamatinud-anon sa iyang serbisyo.

Bisan sa ka hectic sa mga schedule ni Jojo apan espisyal gihapon niini ang iyang pamilya tungod kay mangita kini og paagi nga makahatag og panahon nga makauban ang iyang asawa ug anak, ni Vincent pa.

Gibutyag ni Vincent nga close kaayo ang bonding sa ilang pamilya tungod kay kanunay silang magkauban sa pag-ampo ug maghiusa usab sila sa pagbuhat sa halos sa tanang butang.

Si Vincent miawhag nga magkahiusa ang katawhan sa pag-ampo para mahatagan og kasulbaran ang pagkamatay sa iyang amahan.

Sa laing bahin si Antonio Oposa Visayan Sea Squadron team leader misukit sa mga gustong mosuporta sa pagpadayon sa kawsa nga ilang gisugdan ni Jojo.

Gimanduan ni Oposa nga mobarog ang kadtong gusto nga ipadayon ang ilang kawsa ni Jojo para ipakita ang ilang suporta.

Tanang mitambong sa misa nga mikabat sa dul-an 2 mil mipakita sa ilang suporta sa kawsa tungod kay namarog kini.