Managsuon nadisgrasya

Naangol ang pito ka tawo diin duha kanila ang anaa sa grabeng kahimtang human ang tricycle nga ilang giluwanan nga kusog nga nagdagan kalit lang nalimbuwad ngadto sa kanal.

Nahitabo ang aksidente alas 2 pasado ang takna sa miaging kaadlawon sa barangay San Isidro sa lungsod sa San Fernando.

Ang grabeng naangol mao ang managsoong sila si Jethro Balingit, 13 ug Jennifer Balingit, 15 nga taga South Poblacion sa nahisgotang lungsod.

Samtang ang laing lima ka pasahero nga nakabaton usab og mga pangus ug bun-og sa kalawasan mao sila si Jay Ann Balingit, 23, Michelle Balingit, 16, Tiar Kane Balingit, 14, Mary Vieloz, 22 ug Resty Cabrera, 25 anyos ug pulos nagpuyo sa nahisgotang dapit.

Sa imbestigasyon nga gihimo sa traffic section sa kapolisan sa maong lungsod mao nahibaw -an nga overloaded pasahero ang tricycle nga gimaneho ni Welie Estoria, 21 anyos, taga Panadtaran sa nahisgotang lungsod.

Kusog nga nagdagan ang maong sakyanan subay sa national road sa maong lungsod dihang paghiabot sa maong dapit kalit lang naharos ang manebila ug wala na makontrolar sa driver hangtod nga nalimbuwad kini sa kanal nga maoy nakaingon sa ilang pagkaangol.

Ang mga biktima dali nga gidala sa Vicente Sotto Memorial Medical Center sa dakbayan sa Sugbo.

Samtang ang driver nga si Estoria ang mitahan sa kapolisan sa maong lungsod.