Lahugay sa Customs gipatuman

Lahugay sa Customs Sub-Port of Mactan gipatuman na sa milabay'ng semana diin duha ka opisyal ang milingkod.

Ang bag-ong milingkod isip acting Chief sa Assessment Division sa Sub-Port of Mactan mao si Mr. Ciriaco Ugay, COO IV nga gikan sa Customs district Port of Subic.

Si Ugay kanhing sakop sa Custom Police ug nadestino niadtong tuig 1993 ngadto sa 1999 sa Cebu Customs District Office ug sa dihang naningkamot kini og napromote sa iyang katungdanan nahimo kini nga hepe sa post entry sa Port of Subic.

Pinaagi sa CPO No. B-154-2006 nga gikan sa buhatan ni Commissioner Napoleon Morales kini subling gidestino sa Cebu ug maoy bag-ong Acting Chief sa Assessment Division sa Port of Mactan hulip sa bag-o lang miretiro nga si Mr. Joe Camaya.

Si Ciriaco Ugay manghod ni Agent Alex Ugay sa Intellectual Property Unit kun IPU sa Customs nga nadestino usab sa Customs District Office Cebu.

Laing milingkod isip Collector sa Customs MEPZ 1,2 & 3 mao si Atty. Anjo Castigador nga maoy mihulip kang Allan Umali nga tua na karon gidestino sa Customs FTI sa kaulohan.

Si Atty. Castigador mao usab ang kasamtangang Cebu Customs District Deputy Collector for Operation ug lakip sa iyang gihuptan mao ang MEPZ operation.

Matud pa ni Customs Port of Mactan Collector Atty. Ernesto Urbano nga sa duha niya ka bag-ong opisyal siya nakasiguro nga mas magmalambuon ang ilang collection karong tuiga.

Si Urbano wa pa makasuway ug negatibong collection sukad nga kini milingkod isip Collector sa Customs Port of Mactan gani sa milabay'ng bulan sa Marso kini nakakolekta og 86.2 milyones ka pesos gawas sa ilang target nga 47 milyones pesos sa bulan sa Marso ning tuiga.

Matud pa ni Urbano nga ang pagkolekta sa insaktong bayranan sa importasyon ug koordinasyon sa empleyado maoy usa sa mga sekreto sa paglampos sa ilang matag bulan nga collection.