Nag-bike napasok sa multicab

Usa ka tawo nga nagsakay sa bisiklita kalit lang nadasmagan sa gikasugat nga multicab ug nabuak gayod ang ulo niini.

Nahitabo ang aksidente sa dalan M.C. Briones sa Tipolo, Mandaue alas 9 pasado ang takna sa miaging gabii.

Ang biktima mao si Jolito Potot, hingkod ang panuigon, ulitawo nga taga Bangbang, Cordova, Cebu ug welder sa usa ka establisamento sa dakbayan sa Mandaue.

Gimaneho ni Pablito Arboc, hingkod ang panuigon, minyo nga taga Babag, siyudad sa Lapu-Lapu ang multicab nga nagdala sa plate number GWP 600 nga maoy nakadasmag sa biktima.

Si PO3 Joel Catabas sa traffic section sa kapolisan sa maong dakbayan nga maoy nakatubag sa alarma nga gikahinabi sa Banat News miingon nga gikang nag-inom ang biktima sa tindahan sa maong dapit.

Matud pa niya nga gibiyaan sa biktima ang mga kauban nga nag-inom sa tindahan sa maong dapit human mananghid nga mopauli na kini sa ilang panimalay sa Cordova.

Sa paglabang sa biktima sa pikas lane sa karsada nga nagsakay sa iyang bisiklita kalit lamang nga nadasmagan sa multicab.

Dugang pa ni Catabas nga napasok ngadto sa ilawom sa multicab ang biktima ug dali kining gidala sa Mandaue City Hospital.