52-anyos nanghinol sa 8 ka bata

Nagtingkagol sa prisohan ang 52-anyos nga lalaki kinsa gipasanginlang mimolestiya sa walo ka minor de edad nga batang babaye niadtong Domingo sa hapon diha sa usa ka beach resort sa Pooc, Talisay.

Si Abraham de los Reyes, minyo, residente sa Mohon kinsa misuway sa pag-ikyas dihang gigukod kini sa mga inahan sa mga biktima tungod kay tabangan unta kini og bugno apan gidemalas ang suspetsado tungod kay nasignit kini sa mga estambay diha sa lugar.

Ang mga nabiktima ni de los Reyes nagpanuigon gikan sa nuybe hangtod 13-anyos pulos usab residente sa nahisgutang dakbayan.

Base sa imbestigasyon ni PO3 Marginette Yosores, Women's Desk Officer sa kapolisan sa Talisay nga ang maong mga bata nangaligo sa nahisgutang beach resort.

Si de los Reyes naligo usab diha sa beach resort ug nagpasumangil og sawom ilawom sa dagat apan ang tuyo diay niini mao ang pagpanguot sa mga pribadong parte sa lawas sa mga biktima.

Ang mga biktima nangahadlok tungod kay adunay kalit mibunlot kanila sa ilawom sa tubig ug nanghikap sa pribado nilang lawas.

Nasuta sa mga biktima nga si de los Reyes maoy nagbinuang kanila dihang mitungha kini gikan sa pagsawom hinungdan nga ila kining gisumbong sa ilang mga inahan kinsa uban usab sa pagpangligo.

Niadtong Lunes giduso ang kasong acts of lasciviousness nga naglambigit sa Akta Republika 7610 kun Child Abuse diha sa buhatan ni Prosecutor William Canta sa Talisay.