10% usbaw sa matrikula anha i-request sa DepEd

Ang mga eskuylahang pribado gitugotang makapangayo og usbaw nga bayranan karong tuiga sa matrikula pinaagi sa Department of Education matud ni Dr. Clara Falconi, tigpamaba sa DepEd-7.

Apan iyang gitataw nga dili molapas sa porsiyento ang maong usbaw, basi sa mga reglamentong gimbut-an sa departamento.

Hinuon, matud pa ni Falconi nga kadto lamang mga elementarya ug sekondarya eskulahan ang gitugotan niini.

Sa sayo pa ang Commission on Higher Education (CHED) mipahibawo nga gidid-an niini ang mga tersyaryang tulunghaan nga makapangayo og usbaw sa bayad sa matrikula karong tuiga.

Apan sa bahin sa elementarya ug sekondaryang mga tulunghaan, mihimog pasidaan si Falconi nga kutob ra sa Mayo 15 ang deadline nga gitakda sa DepEd kanila aron dawaton ang ilang mga aplikasyon alang sa tuition fee increase.

Usa sa mga gikinahanglan o requirement nga ipataban sa ilang aplikasyon mao ang bahin sa resulta sa ilang "consultative meeting" kauban sa mga ginikanan.

Matud pa ni Falconi nga ang aplikanteng eskuylahan nga mapakyas sa pagpahigayon og konsultasyon sa mga ginikanan bahin sa laraw nila nga pagpaumento sa bayranan sa matrikula dili kaaprobahan ang maong aplikasyon.

Kini aron pagsiguro nga inig-able sa klase karong Hunyo, wala nay mga ginikanan moreklamo ngadto sa DepEd nga wa sila pahibaw-a sa maong usbaw nga bayranan.

Basi sa guidelines sa DepEd, kinahanglang ang 70 porsiyento sa gipangayong umento, gamiton alang sa pagpaumento usab sa suweldo sa mga kawani sa eskuylahan lakip na niini ang mga magtutudlo.

Ang 20 porsiyento niini gamiton alang sa pagpaayo sa mga ayuhonong dapat sa eskuylahan, samtang ang 10 porsiyento, alang na kini sa tag-iya kon unsaon niya paggasto.

Hinuon gitataw ni Falconi nga sa gobyernong eskuylahan nagpabiling libre ang matrikula niini.