Magsuong babaye gisikop sa mga polis

Duha ka magsuong babaye gidakop sa mga sakop sa Fuente Police Station gumikan sa pasangil nga tigpayuhot og ilegal nga drogas ang usa kanila samtang ang usa giapil gumikan sa pagbabag niini sa mga miarestong mga polis.

Ang gipangdakop giilang sila si Susan Mejica Jacalan, 40, ug manghod niining si Leonora, 35, pulos nga residente sa Riverside, Sambag Uno ning dakbayan.

Ang grupo ni SPO1 Elmo Yanson Rosales mironda sa panimalay sa maguwang nga Jacalan pinasikad sa search warrant nga giluwatan ni RTC Judge Fortunato de Gracia Jr. kalabot sa pagpamaligya og drogas sa nahisgutang babaye.

Atol sa pagronda nakuha gikan sa atubangang bulsa niini ang tulo ka plastik nga ang matag usa may sulod nga tag 11 ka paketeng pulos puno og gidudahang shabu.

Ang 33 ka pinaketeng gidudahang shabu gipailawom na sa laboratory test sa PNP crime lab.

Apan una pa makabiya ang mga polis dala si Susan Jacalan gibabagan sila sa manghod niini ug pugsanong gilugnot ang mga polis ug gikatahong miawhag nga padaganon ang maguwang.

Gumikan niini gidakop og apil sa mga polis ang manghod nga Jacalan ug gikatakdang pasakaan og kasong paglapas sa Presidential Decree 829 kun Obstruction of Justice samtang kasong paglapas usab sa Akta Republika 9165 ang ipasaka batok sa maguwang niini gumikan sa mga nakuhang shabu.