George ihulip ni Jojo – Tomas

Giplanohan karon ni Mayor Tomas Osmeña nga kuhaon ang serbisyo ni kanhi Konsehal George Rama aron ihulip sa gibiyaang posisyon ni Bantay Dagat Program Director ug acting Cebu City market Administrator Elpidio "Jojo" dela Victoria.

Giangkon hinuon sa mayor nga wala pa niya mapahibalo niining maong laraw ang kanhi konsehal apan mao kini iyang napilian nga tukma ug haum nga mopadayon sa pagdumala sa kamerkaduhan dinhi sa dakbayan.

Nagkanayon ang mayor nga bukas siya sa uban pang mga posibling rekomendasyon nga itudlo sa maong posisyon apan prayoridad niya si Rama nga gihulagway niya nga haum sa maong posisyon.

Gipasalig sa mayor nga hatagan niya og gahum si Rama nga makapakanaog dihadiha sa iyang desisyon may labot sa adlaw-adlaw'ng operasyon sa kamerkadohan.

Pagkakaron nagsilbi nga consultant sa City Hall si Rama apan alang kang Osmeña sayon ra unya ang pagmaniobra niini kun dawaton niini ang maong gitanyag nga posisyon gumikan kay mahimo raman nga i-convert ang appointment niini gikan sa pagka consultant ngadto na sa pagka City Market Administrator.

Samtang sa aspeto sa pagpadayun sa nasugdang programa ni dela Victoria sa pagpanakop sa mga illegal nga panagatan determinado ang mayor nga kuha-on ang serbisyo sa usa ka retiradong colonel sa army aron maoy mopadayon sa kampanya apan wala lang una niya itug-an ang pangalan niini gumikan kay wala pa niya kini mapahibalo sa maong tanyag.

Samtang si Atty. Allan Gaviola mao karoy gitinguha sa mayor nga mangulo sa pagpalig-on sa market denial batok niadtong mga isda nga nakuha gikan sa ilegal nga panagat.