Killer ni Jojo gikiha na's korte

Giduso na kagahapon sa korte ang kasong murder batok ni SPO1 Marcial Ocampo kinsa maoy suspetsado sa pagpatay ni Bantay Dagat program director ug Market Administrator Elpidio "Jojo" dela Victoria Jr.

Kagahapon sa buntag mipirma og affidavit diha sa buhatan ni Talisay City Prosecutor Marshal Rubia ang lima ka testigos sa nahisgutang insidente.

Gitataw kagahapon ni Rubia nga wala mosang-at og counter affidavit si Ocampo hinungdan nga ang information giduso dayon ngadto sa korte para sa kasong murder.

Si Atty. Fritz Quiñanola, abogado sa pamilya ni dela Victoria nagkanayon nga dunay kalig-onan ang pagduso sa maong kaso tungod kay ang mga saksi milagda og affidavit ug adunay mga ebidensiya usab nga nakuha.

Gitataw ni Quiñanola nga ang mga sakop sa Criminal Investigation and Detection Group (CIDG) mga professional ug dili mahitabong mamunit og mga testigos ug ang mga testigos dili puwedeng moduso og bakak nga affidavit tungod kay puwede silang mapasakaan og kasong perjury.

Si Ocampo naghilak kagahapon sa pakighinabi niini sa mga tigbalita nga namalibad nga inosente siya sa maong krimen ug mipasangil kini nga scripted ang mga testigos.

Giawhag ni Ocampo nga mopakita ang drayber sa taksi nga iyang gisakyan para motestigos pabor kaniya.

Matud ni Ocampo nga wala siya magdahum nga siya maoy iduot nga nagbuhat sa maong krimen ug kun nakahibalo pa kini nga maoy iduot adto kini motahan sa iyang kaugalingon sa NBI tungod kay mas dako ang iyang pagsalig sa maong ahensiya nga maoy mag-imbestigar sa insidente.

Si Ocampo mibutyag nga nianang buntag sa wala pa mahitabo ang pagpatay ni dela Vioctoria didto siya sa dakbayan sa Danao ug gikan sa Danao diha sa Lorega naniudto sa balay sa iyang higala nga si Arden Tonilon.

Pagka-ala una sa maong adlaw miduaw siya sa iyang higala nga Belgian National nga si Derve Van Dam kinsa naka-confine diha sa Cebu Doctors Hospital ug mi-estar sa room 203 sa maong tambalanan tungod sa appendix ug pasado alas dos sa hapon mibiya kini sa maong tambalan ug misakay og taxi paingon sa Miller Hospital tungod kay nakadawat siya og mensahe sa text gikan sa ilang admin PNCO nga si PO3 Arlan Carillo para kuhaon ang ilang first quarter nga hazardous pay.

Si Ocampo midungag nga mipauli siya sa balay para mag-ilis og gikuha niya ang lista sa ngalan sa iyang mga kauban sa Minglanilla Police.

Sa laing bahin ang maguwang ni Ocampo nga si Peter kombinsido nga walay sala ang iyang manghud ug ang ilang pamilya gustong makig-ayuda sa pamilyang dela Victoria para kuykoyon ang maong hitabo.

Matud ni Peter nga kinahanglang mopahigayon pa gyud og lapad ug lawom nga imbestigasyon ang mga otoridad.