Kagubot sa quarry sa Borbon sutaon

Mga magbabalaod sa probinsiya sa Sugbo ug ang Commission on Human Rights sa rehiyon mopahigayon og imbestigasyon kabahin sa nahitabong kagubot atol sa pagbabag sa mga residente sa gipahigayong quarry sa usa ka dakong magpapatigayon niadtong milabay'ng adlaw sa Campusong Borbon.

Si Bokal Victor Maambong sa ika-unom nga distrito, tsirman sa komitiba sa Environment and Natural Resources nagkanayon kagahapon sa Banat News nga mopahigayon pa og imbestigasyon ang mga magbabalaod sa probinsiya sa maong insidente tungod kay ang hingtungdan nga kompaniya nga mipahigayon og quarry mihimakak man nga aduna silay gipahigayong kalihukan diha sa lugar alang sa usa ka proyekto.

Si Sonia Pua, administrador sa M. Lhuillier maoy gitumbok sa mga residente sa lugar nga maoy misugo sa gipahigayong pagpanghakot og anapog sa milabay'ng adlaw diha sa nahisgutang lugar ug maoy hinungdan nga hapit moulbo ang kasamok tali sa mga residente ug mga drayber sa heavy equipments nga gigamit sa pagpanghakot.

Si Bokal Agnes Magpale sa ikalimang distrito mitataw kagahapon sa Banat News nga sa milabay'ng usa ka buwan aduna na silay gipahigayong imbestigasyon kabahin sa gipabarog nga koral diha sa lugar nga nakahatag og kahasol sa mga mananagat tungod kay layo na kaayo kini og lakawan paingon sa dagat.

Apan matud pa ni Magpale kagahapon nga mopahigayon pa sila og imbestigasyon kabahin sa insidente nga nahitabo sa milabay'ng adlaw aron masulbad ang nahisgutang problema.

Si Alenjandro Alonso, regional director sa Commission on Human Rights mitataw kagahapon sa Banat News nga ang iyang buhatan mopahigayon usab og imbestigasyon sa nahisgutang insidente aron mapasakaan og tukmang kaso ang mga nakalapas sa balaod.

Si Mayor Neal Vergara sa Borbon nagkanayon kagahapon nga gipaningkamutan niyang mamentenar ang kahapsay ug kalinaw sa lugar hinungdan nga iya kining gipabantayan og mga polis.

Gibutyag ni Vergara nga kinse ka miyembro sa Libas-Campusong Farmers Association (Licamfa) nga nagpuyo sa lugar ang apektado sa maong insidente.

Si Vergara mibutyag nga kulang sa mga rekisitos ang Lhuillier maong gipahunong ang gipahigayong proyekto diha sa lugar niadtong Disyembre sa milabay'ng tuig apan mibayad kini og P500 mil nga multa sa kagamhanan sa probinsiya sa Sugbo hinungdan nga mibalik na usab kini sa ilang pagkubkob diha sa lugar sa milabay'ng adlaw .

Si Vergara midungag usab nga sa milabay'ng tuig aduna nay nasang-at nga reklamo diha sa korte ang mga mag-uuma sa maong lugar pagbabag sa quarry.