Mga kap sa bukid gitigum

Gitigum ni mayor Tomas Osmeña ang mga kapitan sa bukirang barangay dinhi sa dakbayan sa Sugbo sa iyang buhatan kagahapong adlawa ug sentro sa ilang gihisgutan mao ang nasigpatan sa mayor nga hinayhinay nga pag-terorismo sa demokrasya sa mga kabus nga Sugboanon sa maong lugar gikan sa pipila ka mga mapahimuslanong grupo.

May labot kini sa pipila ka mga grupo nga nagtinguha nga mo-kontrolar ug mo-develop sa pipila ka mga watershed areas sa bukid alang sa ilang personal nga interes ug panginahanglan taliwala unya sa kahasol sa mga molupyo sa nahisgutang lugar.

Giangkon ni Osmeña nga medyo nawad-an na gyud og kontrol ang kagamhanan sa dakbayan sa mga bukirang barangay sukad gipatuman ang deklarasyon sa watershed law.

Lakip sa mitambong sa maong tigum mao ang mga kapitan gikan sa Sinsin, Sudlon-I,II, Sirao,Tabunan ug uban pa.

Gitumbok sa mayor ang Water Resource Center (WRC) ug ang USC Water Resource Center nga mi-claim karon nga mihimo og pagtuon aron protektahan ug ipaubos sa ilang superbisyon ang mga watershed areas dinhi sa dakbayan sama sa pagpahigayon og reforestation program.

Apan gipadayag sa mayor nga usa ka dakung bakak ug sayop ang maong lakang gumikan kay matud niya personal lang nga interes ang katuyo-an sa maong grupo ug gi-insister sa mayor nga walay kapuslanan ang reforestation program gumikan kay mahimo raman nga pasagdan ang maong mga watershed areas ug dili hilabtan tungod kay mabuhi ra og balik ang mga gipamutol nga kahoy ning maong lugar.

Gipadayag sa mayor nga minilyon ka pesos ang nagasto sa gobyerno sa reforestation program apan hangtud karon wala pa gyud siyay nakitang progresibong resulta niini.

Samtang gihulagway sa mayor nga lahi usab ang reklamo sa mga mulopyo batok kang Ret. Gen. Tiburcio Fusillero nga gihulagway nga nangharas sa mga molupyo sa maong lugar.

Gipasaligan hinuon sa mayor ang maong mga molupyo nga walay himuong demolisyon ang dakbayan batok kanila.

Nunot niini, gipahibalo ni Labangon Barangay Captain Felix Abella nga nagsugod na siya og panghipos sa mga impormasiyon may labot sa maong reklamo sa mga molupyo sa bukid.