Faelnar, uban pa balik na sa ABC

Pormal nang mi-asumer og balik sa ilang tagsatagsa ka mga katungdanan ang tanang mga opisyal sa Association of Barangay Council (ABC) dinhi sa dakbayan sa Sugbo pinangulohan ni ABC President Eugenio Faelnar kagahapong adlawa.

Kini human pormal usab nga gi-turnover ni ABC acting president Rodulfo Estella ug uban pang mga opisyal ang nahisgutang mga posisyon gumikan sa giluwatan nga desisyon sa Sandiganbayan nga naglibkas sa 90 ka adlaw pagka suspenso ni Faelnar ug lain pang siyam ka mga opisyal sa liga.

Kagahapong adlawa, gipahigayon ang pormal turnover ni Estella balik ngadto kang Faelnar sa pagka presidente sa ABC nunot usab sa giluwatang kamanduan ni Mayor Tomas Osmeña nga nagmando kang Faelnar ug mga kaubanan pagbalik sa nahisgutang posisyon.

Gihikling lang una ang maong preventive suspension sa Sandiganbayan samtang wala pay gipakanaog nga desisyon sa motion for reconsideration nga giduso nila ni Faelnar nga nag-kwestyon sa preliminary investigation.

Apil sa mi-asumer og balik nga mga opisyal sa liga mao sila si ABC Bise Presidente Sesinio Andales, Secretary Daido Abcede ug tanang mga sakop sa board.

Nasayran nga gipatuman ang preventive suspension batok sa nahisgutang mga opisyal niadtong Marso 17 may labot sa reklamo sa gitaktak nga project engineer sa liga Leah Rondez nga naningil sa disbursement sa iyang gasoline allowance nga mokabat og P4,300.00.