Airforce 'sakmita'g armas

Sakop sa Philippine Air Force gisikop sa mga sakop sa SWAT team human kini nagdala og armas nga walay lisensiya ilawom sa ikaduhang taytayan sa Pusok Lapu-Lapu sa milabay'ng gabii.

Ang nasikop mao si Sgt. Gregorio Lazo, lumolupyo sa Upper Matumbo, Pusok sa Lapu-Lapu ug nadestino sa Mactan Benito Ebuen Airbase sa dakbayan sa Lapu-Lapu.

Base sa imbestigasyon sa kapolisan sa Lapu-Lapu, si Sgt. Lazo naglakaw sa plaza ilawom sa ikaduhang taytayan ug sa dihang misiwil ang armas nga anaa sa iyang hawak ang mga lumolupyo sa maong dapit dali nga nanawag sa buhatan sa kapolisan.

Atol sa pagresponde sa mga sakop sa SWAT team sa Lapu-Lapu, si PO2 Jumar Ybañez maoy mikuha sa armas nga kalibre .45 ni Sgt. Lazo ug sa dihang pakyas kini sa pagpresentar sa mga dokumento nga nagligalisar sa paghupot ni Lazo sa maong armas kini gisikop ug gitanggong sa kapolisan sa Lapu-Lapu.

Kagahapon pormal nga gipasaka ang kasong kalapasan sa Akta Republika 8294 kun paghupot og armas nga way lisensiya batok ni Sgtl. Lazo ngadto sa Lapu-Lapu City Prosecutors Office.