2 lawas napalgan

Duha ka tawo napalgang patay na - usa niini adunay samad sa ulo ug liog ug ang usa natusak sa bala ang lawas sa duha ka barangay sa dakbayan sa Toledo.

Si Ronnie Purisima, 33-anyos, residente sa Mangga, Sam-ang, Toledo napalgan nga wala nay kinabuhi niadtong Sabado sa buntag diha sa kasagbutan nga bahin sa lugar.

Si SPO3 Virgelio Manatad, desk officer sa kapolisan sa Toledo nagkanayon kagahapon sa Banat News nga si Zosimo Verano, kapitan sa maong barangay, mitaho sa maong insidente diha sa ilang buhatan.

Gibutyag ni Manatad nga niadtong Biyernes Santo sa gabii adunay nakakita nga si Purisima uban sa iyang manghod nga si Roy ug sa ilang mga higala nga nag-inom diha sa balay ni Sergio Iwayan diha sa nahisgutang barangay.

Human sa maong inom mibiya na sa balay ni Iwayan ang magsuong Purisima ug ang mga higala niini paingon na nga mopauli.

Apan si Ronnie gitawag ni Hermie Tolin, residente usab sa maong lugar ug giimbitar nga mohapit una kini diha sa balay ni Maximo Henardino.

Matud ni Manatad nga miuna sa pag-uli ang igsoon ni Ronnie ug ang ilang mga higala tungod kay ang biktima miuban man ni Tolin apan pagkasunod adlaw napalgan na lang si Ronnie nga wala nay kinabuhi.

Sa laing bahin, patay na nga napalgan kagahapon sa alas 6:00 sa buntag ang usa ka 29-anyos nga lalaki kinsa natusak sa mga bala ang lawas niini daplin sa sapa sa Casoy, General Klimaco, bukirang bahin sa dakbayan sa Toledo.

Ang biktima mao si Geronimo Cabrera, taga Sityo Himatayon sa maong barangay.

Gibutyag usab kagahapon ni Manatad sa Banat News nga si Cabrera mitambong og disko niadtong Sabado Santo sa gabii diha sa Tanawan, Pangamihan, Toledo.

Si Manatad nagkanayon nga si Cabrera mibiya sa diskohan aron mopauli apan gibabagan kini sa usa ka wala mailhing lalaki ug dayon gipauwanan og mga bala.