40-anyos gikiha'g panglugos

Gipasakaan na og kihang pagpanglugos ang usa ka 40 anyos nga ulitawo human nakompirmar sa medical certificate nga positibo niyang nalugos ang usa ka 20 anyos nga dalaga.

Usa ka Danilo Saragena, mag-uuma, nga nagpuyo sa nahisgutang lugar ang gisignit nilang PO3 Elias Pelayo ug PO1 Eduardo Semilla niadtong Abril 7, alas 2 sa hapon.

Si Saragena ang gikustodiya nilang barangay konsehal Agustin Alcalla Solis ug tanod nga si Moises Gelvez human usa ka 20 anyos nga dalaga ang nisumbong nga giamong-amongan siya sa suspetsado.

Ang insidenti nahitabo niadtong Abril 6 sa hapon sa dihang siya manguha unta og sugnod duol sa kamaisan.

Ang biktima gipahiling dayun sa Isidro C. Kintanar Memorial Hospital sa lungsod sa Argao kauban ang iyang inahan ug kapitan sa nahisgutang barangay.

Nasuta nga nakuha gyud ang pagkababaye sa biktima.

Ang report sa kapolisan sa lungsod sa Argao nga nadangat kagahapon sa Cebu Police Provincial Office nagpahibawo nga napasaka na ang kasong pagpanglugos batok kang Saragena human nakuha na ang medical certificate isip ebidensiya sa kaso.