2 platoon sa PNP mobantay sa isla

Duha ka platoon sa kapolisan sa lalawigan sa Sugbo ang gipalihok sa pagpatunhay sa kalinaw ug kahusay sa kalihukan sa Semana Santa sa isla sa Bantayan ug Sugat sa lungsod sa Minglanilla.

Kini gilangkuban sa mga bag-ong polis nga nadestino sa Regional Mobile Group 7.

Gipakatap sugod kagahapon ang duha ka platoon sa kapolisan aron mobantay sa mga pantalan sa Hagnaya, San Remegio ug Sta. Fe, isla sa Bantayan.

Nag-abag usab ang bomb disposal team ug k-9 dogs sa Philippine Drug Enforcement Agency.

Ang prosesyon sa Huwebes ug Biyernes Santo sa lungsod sa Bantayan ang hugupan sa bagang duot sa katawhan.

Gimandoan ni Provincial Police Director Vicente Loot ang team nga nedestino sa pantalan sa Hagnaya, San Remegio nga mobiya na sa Sabado sa hapon aron mobalhin sa lungsod sa Minglanilla alang sa Sugat sa Domingo sa kadlawon.

Lakip sa pabantayon sa Sugat ang bomb disposal team ug K-9 dogs sa PDEA nga nadestino sa isla sa Bantayan.

Lakip sa Gibutangan og dugang pwersa sa kapolisan ang dakbayan sa Talisay ug Cebu South Bus Terminal atol niining pagsaulog sa Semana Santa.

Bisan pa sa hugot nga seguridad nga gipatuman sa kapolisan sa kalihukan sa Semana Santa, wala usab biya-i ang mga lungsod sa midnorth area sa lalawigan sa Sugbo diin dunay mga hulga sa pagpangataki sa mga rebeldeng New People's Army.