Seguridad sa Buhing Kalbaryo higpitan

Higpit nga seguridad ang ipatuman sa mga tawong mosaksi unya atol sa pagpahigayon sa tinuig nga kalihukan sa paghulagway sa Buhing Kalbaryo nga himuon karong Biyernes Santo diha sa Cebu City sports Center ngadto na sa Guadalupe Church.

Gibutyag ni Konsehal Procopio Fernandez, tsirman sa committee on police fire and penology andam na ang kapulisan dinhi sa dakbayan alang sa maong kalihukan.

Kini pinaagi sa gilusad nga Oplan Semana Santa nga gipangulohan ni Cebu City Police Office (CCPO) acting chief Melvin Gayutin.

Gawas niini dugang 50 ka mga sakop sa Regional Mobile Group (RMG) ang ipakatap sa rota nga agian sa buhing kalbaryo karong Biyernes Santo aron masiguro ang pagpatunhay sa kahusay ug kalinaw.

Kini wala pay labot sa mga i-tap nga tanod sa kabarangayan ug uban pang mga civilian volunteers.

Hinuon ang mga sakop sa Parish Security Group (PSG) maoy gitahasan nga mopatunhay sa kahusay ug kalinaw sa lainlaing mga simbahan ilabi na atol sa pagahimuon nga sugat sa pagkabanhaw unya sa Domingo sa kaadlawon.

Ang mga simbahan nga gitumbok sa konsehal nga ipaubos sa subsob nga pagmonitor atol sa sugat mao ang Cathedral, Parokya ni San Nicolas de Tolentino, Guadalupe Church ug uban pang mga simbahan dinhi sa dakbayan nga dunay sugat nga himuon karong Domingo.