2 ka taytayan monitoron

Mga polis sa dakbayan sa Mandaue higpit nga mohimo sa ilang pagbantay sa mga simbahan, Marcelo Fernan Bridge, First Mactan Mandaue Bridge ug uban pang mga dapit nga pagatapokan sa daghang tawo sa Biyernes Santo ug hangtod na sa Sugat sa kaadlawon sa Domingo sa pagkabanhaw.

Si Acting Chief Paquito Belandres mimando sa tanang kuwerpo sa kapolisan sa dakbayan aron sa paghatag og kasiguroan sa mga tawo batok sa pundok sa mga dautan nga mohimo sa ilang ilegal nga kalihukan.

Nunot usab niini si Belandres higpit usab nga mipatuman sa Oplan Semana Santa ug gipaubos ang iyang mga sakop sa full red alert status.

Ang unom ka presinto sa kapolisan sa dakbayan gihatagan og ilang mga kaugalingong kaakohan sa pagbantay sa matag simbahang Katoliko nga nahisakop niini.

Si Mayor Thadeo Ouano nga gikahinabi sa Banat News nanghinaut nga ang dakbayan bisan sa mga dagkong kalihokan nga pagahimoon magpabilin kanunay ang kahapsay ug kalinaw.

Matud pa niya nga ang mga gimbuhaton sa kapolisan niining pagsaulog sa Semana Santa maisip lamang nga ginagmay kun itandi sa adlaw sa pagpahigayon sa Asean Summit sa Cebu International Convention Center sa reclamation area sa dakbayan sa Mandaue.