Estella wa pa mohawa sa ABC

Bisan og gimanduan na sa Sandiganbayan nga putlon ang 90-day suspension order aron mobalik na sa katungdanan sila si Association of Barangay Council (ABC) President Eugenio Faelnar ug mga kaubanan apan hangtud karon wala gihapon ibakante ni Acting ABC president Rodulfo Estella ang maong posisyon.

Atol sa pagpakighinabi sa Banat News kang kapitan Estella kagahapon sa buntag gibutyag niini nga padayon gihapon siyang nag-opisina sa ABC ug maoy namirma sa mga transaksiyon sa maong buhatan apil na ang pag-aprobar sa payroll sa mga kawani.

Matud ni Estella hangtud nga dili siya makakuha og klarong kamanduan o ba kaha katin-awan gikan sa Department of Interior and Local Government (DILG) may labot ning pag-recall sa suspension order sa mga suspendidong opisyal sa liga dili niya biyaan ang maong posisyon.

Iyang gipasabot nga peligro usab nga basta basta na lang siyang mopahawa isip caretaker sa ABC kun walay proper turnover nga himuon gumikan kay siya maoy manubag kun dunay mga manghitabo ug peligro usab siya nga mag-atubang og dereliction of duty.

Hinuon si Faelnar sa iyang bahin buot una niyang klaruhon ang maong giluwatang direktiba ug unya na siya sa Lunes mo-asumir og balik isip Presidente sa Liga kun maklaro na ang tanan.

Nasayran nga niadto pang miaging Abril 7 miluwat og direktiba si Mayor Tomas Osmeña nga nagmando sa pagpabalik na sa katungdanan sa 10 ka mga opisyal sa ABC nga gisuspenso og 90 ka adlaw.

Gani si ABC vice president Sesinio Andales nga maoy kasamtangang kapitan sa Pahina Central ni-asumir na kini og balik sa iyang katungdanan.