Dela Victoria gipusil

Pipila ka adlaw human makadawat og hulga sa kinabuhi, ang environmentalist nga si Elpidio dela Victoria gipusil sa nag-inusarang lalaki kagahapon sa hapon diha mismo sa gate sa iyang balay sa Ramona Subdivision, Sitio Dawis barangay San Roque, Talisay .

Sila si dela Victoria nga maoy Bantay Dagat Commission chairman ug ni Atty. Antonio Opposa sa Visayan Sea Squadron duha na ka semana ang nakalabay una ng mitaho dinhi sa Banat News nga dunay patong nga usa ka milyon ang ilang mga ulo.

Kagahapon human mikanaog si dela Victoria sa sakyanan sa Bantay Dagat Commission usa ka wala mailhing lalaking may gitas-ong 5'5, moreno ang pamanit, semi-opaw ang buhok ug dauton ang panglawas ang kalit nga misunod kaniya ug mipusil makadaghang higayon.

Si Jaheel Morillo, residente sa nahisgutang lugar mitug-an sa Banat News nga nakit-an niyang yano kaayong milakaw ang suspek ug misakay sa nagpaabot nga taxi.

Ang gitumbok mao ang kolor puti nga taxi ug may numerong GMU 995 diin duna pay laing kaubang mga lalaking nagpaabot maoy gisakyan sa suspek sa dayon ng pag-ikyas.Giingong ang taxi diha ra mag-aginod og dagan sa may eskina sa dalan Ramona.

Matud pa sa ubang mga residente sa unang pagpusil nakadagan si dela Victoria pasulod sa gate sa ikaduhang higayon diha naigo sa bungbong sa balay apan sa ikatulo naigo na ang market administrator sa dakbayan sa Sugbu apan nakahimo gihapon kini og dagan pasulod sa salas diin iyang gipangayoan og tabang ang iyang anak nga si Vincent.

Si Vincent na ang midala kaniya sa Chong Hua hospital ug lahos sa operating room.

Dugang pa sa mga silingan ni dela Victoria ang suspek nagpaabot nang daan diha sa gawas atbang sa gate sa balay.

Giingong nagpangutana pa ang suspek kung asa magpuyo si Jojo, dangtan pila ka minutos miabot ang naulahi ug diha na kini gisundan sa gunman.

Usa ka wala mopailang molupyo ang mitug-an nga gisundan pa sa mga istambay ang suspek apan dihang dunay misinggit nga dunay armas ang suspek nahadlok na sila pagduol.

Tulo ka tawo ang giimbitar kagahapon sa Criminal Investigation and Intelligence Branch pila ka oras human sa insidente gikan diha sa North Reclamation Area nga mao sila si Rito Flores, Timoteo Laura ug Francisco Flores , mihimakak ang tulo sa kalambigitan sa kaso ug nangangkong gikan lang sila mangaon diha sa usa ka mall sa NRA.ug padulong na balik sa usa ka motel diin nila ibilin ang ilang taxi.

Si Opposa mitug-an sa unang pakighinabi sa Banat News niadtong Marso 27, dunay suod niyang higala nga dunay piniyalang tawo diha sa Norte (North Cebu) ang nakadawat og impormasyon kabahin sa planong paglikida kanila.

Wala niya ibutyag kung si kinsa ang maong tawo nga giingong maoy nagplano niini apan iyang gibutyag nga gipahibalo na niya kini sa NBI Anti Organized Crime Task Force.

Dugang pa niya nga iya gyud kining giseryoso gumikan kay ang nagpahibalo kaniya suod niyang higala ug dili mahitabong pasiawan siya og susama niini ka seryosong butang.

Si Opposa ug dela Victoria maoy nangusog aron temporaryong tak-upan ang Visayan Marine Triangle ngadto sa mga komersyal nga panagatan ilabi na sama sa panagatang "de zipper" nga gihulagway niyang makadaut gyud.

Dugang pa sa Visayan Sea Squadron nga ang 'de zipper' kun "Danish Seiner fishing method" manulod na sa 15 ka kilometrong limit sa kadagatan gikan sa kalungsuran nga diin manginabuhi ang mga gagmayng mananagat.