Sinsilyo sa VK, gidonar sa CH

Dul-an na sa P300,000 kinumpiskar nga sinsilyo gikan sa illegal nga sugal sa video karera machine ang nadonar sa kagamhanan sa dakbayan sa Sugbo ngadto sa mga kabataan ubos sa Cebu City Task Force on Street Children nga nahimutang karon diha sa Pari-an Drop in Center.

Ang maong kantidad nahipos gikan sa mga nasakmit nga video karera machine sa kapulisan nga gipangdugmok diha atubangan sa City Hall.

Gani kagahapong adlawa laing 85 ka mga video karera ang gipangdugmok diha sa City Hall ug dunay nahipos nga mga sinsilyo nga gibana banang moabot og P40,000.00.

Kadaghanan sa mga gidugmok nga video karera nasakmit sa gilusad nga pagpangronda sa mga sakop sa Criminal Intelligence and Investigation Bureau (CIIB) didto sa Lawis,Pasil niadtong miaging semana.

Basi sa nahipos nga rekord gikan sa buhatan ni konsehal Augustus "Jun" Pe, moabot na og 894 ka video karera ug moli-moli ang nasakmit sa kapulisan gikan niadtong bulan sa Febrero sa milabay'ng tuig hangtod karon.

Nunot niini ni-abot usab og P294,564.00 ang tanang mga sinsilyo nga nahipos gikan sa maong giguba nga karera ug ang maong kantidad giturn-over dayun kini sa mga street children sa Pari-an.