Lima ka polis pasidunggan

Lima ka mga polis nga miapil sa operasyon batok sa usa ka gitumbok nga tulisan nga ilang napatay sa maong operasyon ang girekomendar ni Cebu City Police director Melvin Gayotin nga hatagan og pasidungog.

Ang girekomendar sa direktor sa kapolisan sa dakbayan mao sila si SPO3 Sanico Julejule ang intelligence team leader sa Pardo Police Station ug mga kaubanan sa Miscellaneous team nga sila si PO3 Hermino Seares, PO2 Arnel Sanchez , PO3 Joel Sanchez ug ang kontrobersyal nga bodyguard ni Mayor Tomas Osmeña nga si SPO1 Adonis Dumpit kinsa miapil sa operasyon.

Atol sa insidente si PO3 Joel Sanchez maoy nagrabehan sa insidente human kini pusila ni Roberto Placer diha sa Sitio Soran, barangay Kinasang-an atol nga gitunol ang arrest warrant sa naulahi gumikan sa kasong frustrated homicide, si Placer maoy gitumbok nga responsable sa pipila ka mga pagpanulis sa nahisgutang habig sa dakbayan.

Si Dumpit kinsa miresponde usab napusilan ni Placer apan swerteng diha sa handgrip sa gasport miigo ang bala ug mipisik ang tipaka niini sa ulo ni Dumpit hinungdan sa pagkahagbong niini sa hagdan.

Si direktor Melvin Gayotin sa pakighinabi sa Banat News mitug-an nga ang Police Regional Office nay paigo kung unsang pasidungog ang ilang ihatag ngadto sa iyang lima ka sakop.

Kahinumduman ang maong mga polis gipasidunggan usab ni Mayor Tomas Osmeña pinaagi sa paghatag og tag P50 mil nilang ni Dumpit ug Sanchez samtang ang laing tulo tag P10 mil matag usa.